أخبار حياتية لزوادتك اليومية

لست مستعداً للتبرع؟

إليك خمس طرق يمكنك أن تساعد أليتيا من خلالها

  1. صلي من اجل فريقنا ونجاح مهمتنا
  2. تحدث عن أليتيا في رعيتك
  3. تقاسم مضمون أليتيا مع أصدقائك
  4. أوقف الـ ad blockers عندما تقرأ أليتيا
  5. تسجل في نشرتنا المجانية واقرأ المقالات يومياً

شكراً!
فريق أليتيا

تسجل

Aleteia

عشية عيد الميلاد والدني فرح وموايد وخمر وضحك دقّ الـ”بونا” الباب وفتحتلو…”فوت يا بونا”

Share

لبنان/ أليتيا (aleteia.org/ar) عشية عيد الميلاد والدني فرح وموايد وخمر وضحك وتخربش هدايا، وصوت جراس  بابا نويل هون هونيك…رحت زور  وردة بكعب الضيعة….

بيتها بتنزلو نزول ع طريق أجر… طريق أجر من ورق سنديان بتوديك ع باب خشب عتيق  عمرو من عمر ضيعتنا…

انا قرّب ع بيتها وصوت جراس بابا نويل تبعد لبعيد…

انا قرّب ع بيتها والدني تغرق بهدوء وادي سنديانو راكع عم بصلّي…

دقيت ع باب الخشب وفاح الخشب بخور ووجوه تطل وتروح من تحت العتبة….

“تانت وردة! انا ابونا فادي … ”

فتحت  وردة ساقوطة الباب وطل علي وج مزيّن بجدايل بيض، وعيون متغطيين بتجاعيد حفرتها الشمس ورياح المواسم…

“فوت يا بونا… يا هلا فيك”

موقدة ودفى من سما… ونار ترقص لمغارة صغيرة من خيش وأشخاص جفصين… وحول المغارة سنابل قمح  خضرا وصغيرة نزرعو يوم عيد القديسة بربارة من كم جمعة…

“حلوة هالمغارة ! ولون النار مشعشها…”

قعدت وردة حد الموقدة وسكبتلي فنجان سخن من زهورات الوادي… ورحنا ندردش حد طفل دفيان بخيش، دفيان بحطب تلملم تحت شمس تموز لصقعات كانون… والهوا يفوت من فساويخ شبابيك عتيقة ويتشلقح ع كعب الموقدة…

“خبريني عن العيد يا وردة؟”

“يلّي ما عندو يسوع بقلبو، ما رح يلاقي عيد الميلاد بالهدايا والموايد…وأغلى هدية تحت شجرة العيد، هي العيلة المجموعة… شو حلو نفتح الهدايا والأحلى نفتح قلبنا لنسامح لي جرحونا بسبب ضعفن… شو حلو نزيّن الشجرة والأحلى نزيّن حالنا بتساعية الميلاد… شو حلو نطبخ للعيد والأحلى نكون نحن لقمة العيد: ببسمتنا وبكلمتنا وبأصغاءنا…

شو حلو ندق جراس العيد والأحلى ندق بواب اشتاقت لطلتنا…

شو حلو نعمل مغارة وطفل ورعيان ومجوس والاحلى تبقى هالمغارة بقلبنا ع مدار السنة… شو  حلو نهدي هدايا لتضوي العيون، والاحلى نهدي سلامنا وغفراننا لتضوي عتمة هالدني… عتمة من قتل وكذب ونميمة ومال وحقد..”

– “من وين يا وردة بتعرفي تقولي لي قلتيه؟”

– “رسالة الميلاد هي تآمن انك مش وحدك… الله معنا… وزيارتك يا بونا هي شقيّة الله علي…”

وصوت حطب ولعان….وقنديل معلق بقنطرة عم بينوس…

فلّيت من عند وردة…وعرفت انو العيد بيزور أولاً  كعب الوادي والقلوب البسيطة والمعالف المنسية…والعيد ما بدّو فلسفة بدو محبة…العيد ما بدّو تجارة بدّو حرارة…حرارة قلب…

 

صارت ساعة ١٢ بليل… ولازم قدّس قداس عيد نص ليل والوعظة هي: العيد يا فادي ما بيجي من المحلات التجارية! العيد بيجي من معلف بقر وطفل ع تبن مصقع عم يدفى من حطب تلملم بصيف دهبي لهوا اسود  عم بيفوت من فساويخ شبابيك عتمة هالدني  ليدفى ع موقدة نار  ولعانة من ألفين سنة… وما رح تنطفي…

 

الاب فادي روحانا

كتاب دقة قلب في مكتبة انطوان

 

العودة إلى الصفحة الرئيسية

Aleteia's Top 10
  1. Most Read
Newsletter
Get Aleteia delivered to your inbox. Subscribe here.