تسجل في فايسبوك ماسينجر 
لبنان/ أليتيا (aleteia.org/ar) بكل فترة في عنا قصة و كل قصة حسب الموضة
صور خبار جمل زجل قديسين صارو يكتبو يا محلا شي شاعر عم يتغزل ب يلي بحبا
صور عالطالع و النازل كل واحد بدو جملتو يحبوا العالم بركب صورة شي قديس و بيكتبلو اسمو عليا
والمشكلة الكبيرة هيي ( عذرا عالتعبير ) سطحية كتار من يلي بعدو حالن بآمنو ! و بصدقو هالخبار
هالقديس اجا ع ولد و قلو عمول هيك …
هالقديس طلب من بنت تخبر الناس هالخبرة
هالقديس ظهر بالصورة …
و كتار القصص و بيختمو كل قصة
ارسل هالرسالة و عمول شير !
بصورو الشمس و ببلشو ليكو العدرا بالشمس
بصورو البحر ليكو الغيم شو شكلو فوق البحر
خبار و بصراحة تعتير هيدا اسمو
راكضين ورا صور و خبريات
راكضين ورا تماثيل بترشح زيت
راكضين ورا رسايل لتردنا عالكنيسة
منحمل كلمة و منشمي فيا منآخد يلي بدنا ياه :
اسمعو اقوالهم و لا تفعلوا افعالهم و منشارع هيدي للكهنة !!! يا خيي يا حبيب قلبي لمين هالجملة نقالت بالإنجيل ؟ شو كان يسوع يتصرف و كيف كان يتصرف ؟ و ين يسوع بحياتك ؟
ما فينا نفصل يسوع عمسطرة و نآخد منو يلي بريحنا
ما منقدر نعلّب كلماتو حسب تفكيرنا لأنو ما بتزبط …
ايه ما نحنا مسيحيي اكتر من فلان
ايه ما نحنا منفهم اكتر من فلان
ايه ما نحنا وين و هيدا وين
طيب يا خيي الله يبارك فيك و التواضع وين ؟ و الصمت وين ؟ حكمة الله وين ؟ عمل الله اليومي بحياتك وين ؟ نعمة الله كيف عم تخليا تنمى فيك ؟
لا بتشارك بالقداس
لا بتعرف انجيلك و لا بتقرا فيه
ما بتعرف تصلي و لا بتعرف انو انت كمسيحي في عندك مرجعية فيك تستشيرها و تحكي معها يلي هيي كنيستك ! ما بتعرف غير انو تحكم عليا اذا كان فيا شي ما عاجبك ! غريب
مش كترة التساعيات و الصلوات بتخلصك
مش الكلمات البتصير ترددها متل الحافظ درسو و ما بدو ينسا و لا حرف انما تفهم يلي عم تصلي ليصير كل نفس بتاخدو صلاة و تصير تعرف تفهم الصلاة العم تقريا و تصليا و تتأمل فيا
مسبحتك مش زينة للرقبة و الإيد و السيارة
المسبحة لتصلي فيا و لو بيت واحد ! تتأمل تتعلم !
كنا نقول كتار يلي عالهوية مسيحيي
بس اليوم للأسف اكتر من كتير اليوم ضايعين بهرطقات و خبريات و عواطف و سطحيات
انك تكون مسيحي ملتزم بكنيستك
مش يعني انت سخيف
السخيف يلي لا معلق بشي و مفكر حالو بيعرف كل شي حاج تحكم ع غيرك خدا ع حال قبل ! عمول شي !
انك تقرا انجيلك يومية هيدا مش قصاص هيدا اقل شي بتعملو لأنو بكل مرة رح تقرا بهالكتاب رح تتعلم كيف بتكون انسان مليان من رحمة الله و رح تتعلم كتير امور انت اصلا ما خطرو ع بالك لأنو من ٢٠٠٠ سنة لليوم بعدو الإنجيل و رح يبقى كلمة الحياة
قرا فيه و تعلم منو لتفهم كل شي حواليك عم يصير !
العواطف ما الها محل
بالحياة في صليب لتقوم عنو بدك تحملو و تموت عليه
المسيحية مش خبرية
المسيحية طريقة عيش
رحمة مترجمة بقلب العالم
لا تفكر بدي اعرف انك مسيحي بكترة التماثيل ببيتك و الصور و الخبار و القصص لأ
بدي شوف فيك يسوع و هيدا بيكفي
يسوع الحي
يسوع الرحمة
يسوع الحب
تعرف ع يسوع الحقيقة
كرمال لما بتلاقى فيك اتلاقى حقيقة فيه من خلالك
