أليتيا

قصة حب رائعة حصلت على فراش الموت في لبنان…أصابها السرطان وسألت زوجها “هل ستتركني”؟؟؟ هل تفعلون ما فعله الزوج؟

VOLKEL, THE NETHERLANDS - JUNE 15: Finnish Air Force Boeing F/A-18 Hornet at the Dutch Air Force Open Day on June 15, 2013 in Volkel, The Netherlands
مشاركة
تعليق

لبنان/ أليتيا (aleteia.org/ar)  صار معي سرطان بعد عرسي ب 3 شهور، كنت احكي لأمي انه راسي بوجعني ودايخة…، وبعد العرس حكتلي يمكن من الحمل، بس اخر مرة قلبت عالأرض ، صحيت لقيت حالي بالمستشفى !

كان وجه امي ما بيتفسر؛ وزوجي واقف عجنب ومو عارف شو يحكي ….

قلتلن شو في ؟

حكولي هلئ ارتاحي ما فيكي الا كل خير…

 

 

ما بعرف كنت تعبانة كثير ومش مركزة بس ما صدقتهم …..

بعد يومين ، اجا زوجي ومسك ايدي، قلي حبيبتي بدي احكيلك شغلة ، تفاقيد ربنا رحمة !

وانا عارف انك قوية ورح تتحملي، عندك ورم صغير، بتتعالجي وبترجعي مثل اول وأحسن …

انا وقتها انصدمت وصرت أعيط قلتله رح موت صح خلص ما في امل احكيلي قديش رح عيش ….

قلي ولك بلا حكي المسلسلات ما رح تموتي ، بس لازم تبلشي جلسات كيماوي ….

هالكلمة وقعت على راسي مثل الصاروخ! وعطول خطر ببالي منظري كيف رح يصير، ووجع العلاج، وأكيد زوجي رح يتركني

 

 

قلتلو رح تتركني صح !

ضحك وقلي شوجنيتي ما رح اتركك ، ورح صير اجي استناكي بعد كل جلسة….

بس انا رفضت العلاج؛ قلتله بدي موت هيك ولا اتعذب وموت وانا خسرانة كل شي ورحت عالبيت!

اجت امي لعندي واهلي وكلهم يقنعوني اتعالج ورفضت…

تاني يوم لقيته جاي وحالق شعرو عالصفر

اطلعت في وقلتلو ليشششش بحب شعرك!

قلي خلص هيك بطلتي تحبيني يعني؟

قلتله : لا بحبك …

 

 

قلي لكن جهزي حالك للعلاج وفعليا اقتنعت منه …..

اول جرعة كيماوي، دخلت لحالي عالغرفة، حرقتني حرق، حسيت بنار بتمشي بجسمي، وللحظة شفت الموت، وبعد ما خلصت نمت كثيررررررر !

صحيت لقيتو ماسك ايدي وجنبي ، قلي كيف صرتي ….

عيطت وقلتلو متوجعة …

قلي رح تمشي ….

وصارت حالتي بعد كل جلسة اني صرت اخسر شعري؛ والشغلات الحلوة الي فيي….

بشرتي كانت باهتة كتير وعيوني ذبلانين، كنت اطلع عزوجي بحسرة واحكي شو ذنبه يعيش هالحياة معي ….

بعد فترة من العلاج قللتله طلقني،،،، حسيت اني ظالمته معي ، بتذكر وقتها عصب علي وصار يحكيلي حرام عليكي انا مقصر معك بشي !

قلتله لا والله بس انا ظالمتك !

 

 

قلي … ولو انا صار معي هالشي متأكد ما تخليتي عني ضلك قوية !

ثاني يوم كان عندي جلسة، كان في وحدة متزوجة معها سرطان كمان بشوفها قبل الجلسة دائما، كانت تحكيلي كيف زوجها طلقها بعد ما عرف انها مريضة ، وكيف بيت حماها بيعاملوها!

سألتها طيب انتي ما تزوجتي عن حب!

قالتلي حب 4 سنين …

وبعد هالحب تركك لانك مرضتي!

قالتها والحسرة بعيونها، للاسف كان يحب شكلي …..

وقتها شفقت عليها جد، تذكرت كيف زوجي تقدملي بطريقة تقليدية؛ ورفضته، وبعدها رجع تقدملي ورجعت رفضته ، ولحد ما تعرفت علي وارتحتله وافقت علي !

 

 

سألت الممرضة عنها، قالتلي عطتك عمرها!

انا وقتها صابني انهيار ما عرفت اتحكم بحالي، صرت عيط وقول اكيد رح موت متلها اجا زوجي لعندي وشافني هيك جن قلي شو في !

حكتله القصة زعلللل كثير وحضني، قلي والله رح تعيشي هلأ كنت عند الدكتور وقلي انك متحسنة كثير !

 

فتت عالجلسة وطول الوقت وصورة الست للي ماتت براسي؛ يا الله اكيد ماتت من حسرتها، اكيد ماتت وحيدة ولا حدا كان معها !

طلعت بعدها … وضليت فترة مكتئبة كثير، بس زوجي ما قصر ليغيرلي جو، يحسن نفسيتي، يساعدني بكل شي

 

 

 

كنت حابة كل ذرة بحياتي مشانه بس! لانو كان قوتي وقت ضعفي …

فعليا انا انشفيت من هالمرض، وحياتنا رجعت طبيعية وصار عندي بنوتة اليوم سميتها على اسم الست الي شفتها بالمستشفى! بس دائما بقلا اوعك يا ماما تتزوجي واحد حب شكلك وبس، تزوجي واحد حب روحك الحلوة، عقلك الكبير، تفكيرك !

تزوجي عشان لو وقعتي يوقفك وما يتركك !

طبعا بنتي بتصفن ومو فاهمة شي … بس بتقلي اتزوج واحد مثل بابا !

برد عليها اي متل ابوكي … تزوجي لانو الزواج استقرار ، تزوجي الشخص الي بدك تقضي كل عمرك معه لو شو ما صار لاي حدا فيكم!

تزوجي الي حب قلبك وروحك مو الي حب شكلك ، واعرفي انه الزواج في ايام حلوة كثير وفي ايام مرة ! بس مع لي بحب روحك كل الزعل رح تنسي …..

 

لانو اللي بيحبك رح يفرجيكي الحياة الحلوة من خلالو هوي وبس.

 

المصدر: موقع بنت جبيل / منقول أيضاً

 

 
للراغبين بالصّلوات اليوميّة تابعونا عبر صفحة

Aleteia Ar – Daily Prayers

 

للراغبين بمتابعة اخبار المسيحيين في العالم تابعونا عبر صفحة

Aleteia Ar – Latest Christian News

 

للراغبين بمتابعة أخبار البابا والفاتيكان تابعونا عبر صفحة

Aleteia Ar – Vatican News

 

العودة إلى الصفحة الرئيسية

 

 

النشرة
تسلم Aleteia يومياً